Boodskap in ’n bottel
14 j. later word brief in seesand gevind
Deur Vania van der Heever Woensdag 18 Maart 2015 03:10
Angela Harris vertel hoe verras sy was toe sy hoor iemand het die bottel, wat sy 14 jaar gelede op die strand by Danabaai begrawe het, gevind. Foto: Nelius Rademan Hiér het Angela Harris 14 jaar gelede haar bottel in Danabaai in Mosselbaai begrawe. Foto: facebook
Sy was 13 jaar oud en met vakansie in Mosselbaai toe sy vriende probeer maak het deur ’n brief in ’n bottel op die strand te begrawe.
Meer as ’n dekade later het ’n vreemdeling op dié bottel afgekom.
Angela Harris (27) van Meyersdal, Alberton, het die boodskap in ’n bottel 14 jaar gelede op die strand by Danabaai begrawe.
■ Lees ook: ’n Mens in ’n bottel en ‘Nieu-Seeland darem baie ver vir bottelbrief’
Daarin het sy ’n brief, haar gunsteling-hangertjie, ’n ring van haar suster wat toe vyf jaar oud was, van haar gunsteling-sjampoe en ’n armband van haar eerste partytjie gesit.
In die brief beskryf Harris haarself en gee sy haar telefoonnommer en adres, en moedig wie ook al haar bottel vind, aan om haar te kontak.
“Die persoon wat my bottel vind, moet my goed mooi oppas asseblief. Ek gee nie om of jy wit, swart, vet, maer, ryk of arm is nie. Skryf asseblief vir my terug,” het sy geskryf.
’n Skattejagter het Saterdag met sy metaalverklikker op die strand geloop toe hy op die bottel afkom. Michael de Nobrega van Mosselbaai het Harris via Facebook opgespoor en vir haar foto’s van haar “skat” gestuur. Harris het Dinsdag aan Beeld gesê sy het van die bottel vergeet.
“Ek was met vakansie by my ma se huis in Mosselbaai in Desember 2001. Ek was lief om op die strand te sit. Ek wou nuwe vriende maak en dalk ’n kêrel ontmoet. Ek het eendag op die strand gesit en dagdroom en net besluit om dit te doen. Ek het nie die bottel in die water gegooi nie, maar dit liewer begrawe.”
Harris en die man wat die bottel gevind het, het nog slegs op Facebook met mekaar kommunikeer.
“Ek het vergeet wat ek in die brief geskryf het. Toe ek die foto van die brief sien het ek my doodgeskaam. Ek gee hopeloos te veel besonderhede oor myself.”